انا وانت كده على طول ..

يارب تكون بتقراها
______________________

انا وانت كده على طول ..
بنتخانق عشان حاجه
ومبنعرفش إيه هيا ..
انا منك بشكل غريب
ومنى انت وليك فيا
ونفسى بجد أقول انى
بحبك بس مش عارف
أقولها إزاى ؟!
بحبك وانت بتنادى
عشان أعملنا اتنين شاى
سجاير إيه انا بطلت !؟
يا بابا خلاص انا عارف
بإن الإرتباط ببنات ..
مزعل حضرتك منى
وسهرى كل يوم للفجر
مضايقك وانت مش بتقول
بقولك ايه انا عارف ..
بإنك منى مضايق
فـ متخبيش !
انا عارف بإنى كنت
مش مفروض ..
أعيد سنه تانيه كليه !
انا عارف بإن الشعر
مش شغلانه تفتح بيت !
ولازم يبقى فيه شهاده
ومتأكد بإنك أنت أكتر حد
خايف منى على نفسى
وخايف مـ الحياه عليا ..
يابابا إفهم بإنى كبرت
كفايه خوف وبزياده ..
بقولك إيه انا آسف ..
ومش عارف انا أسفى
ده أصلا ليه !
انا آسف على الفايت وكل
الجاى ..
بقولك إيه انا قايم عشان أعملنا
إتنين شاى .. !