متسألنيش عن الأحلام

متسألنيش عن الأحلام
انا قررت محلمشى !
انا اتعودت انى أمشى
على الصبّار ومتوجعش !
يسبنى الناس كتير جدا
وعينى برغم كل فراق
مبتدمعش
متسألنيش ..
انا إتعودت أبان جامد
ومن جوا انا بضعف
انا الوتر اللى لو يعزف
هيعزف لحن كله نشاز
زمان أحلامى كانت ايه
يدوب حدوته تحكيها
وانا جوا سرير هزاز
لا عمرى عرفت ايه
معنى الحصان لـ أبيض
ولا حبيت أميره فـ برج
ملخص كل أحلامى
ورق كاتب عليه أشعار
بقاله سنين فـ حضن الدرج
قفلت عليه بميت مفتاح
وقولت لنبض قلبى إرتاح
ومتدّقش !